1/ E circunstanze : L’associu CURBARA CULTURA, in partenariatu incù u Centru Culturale Voce, ha mandatu un invitu a i pueti per una serata u sabatu 13 di marzu, a sera prima di l’elezione territuriale. Di più, ci era stata due ghjorni prima una timpesta di neve chi avia bluccatu e strade. Di sera, dà 7 ore à mezzanotte, una manata di paesani hè ghjunta à l’anzianu presbiteriu trasfurmata in salla di attività culturale. Ci era da beie e da manghjà. E, vistu chi era la prima volta ch’ellu s’urganizzava una serata di Chjama e Rispondi in Curbara, a ghjente aspettava ch’ella cummenci, intantu che i pueti, una a unu, ghjungnianu. Salutavani e cunniscenze, si calavanu, si manghjavanu un buccone, si faccianu fallà un bicchjerinu. E po d’un colpu, Roccu Mambrini attacò. Cusì indè u filmu manca a metà di u primu filaru, perchè Roccu ha attacatu senza privene.

2/ u filmatu : Pasquale Galeazzi, incù una sola telecamera nantu à a spalla, a pigliatu u versu di lascià andà u so sguardu liberamente. Un hè micca sempre nantu à quellu chi canta, e cum’ellu facci u spettatore presente, senza mai perde l’interessu per u cantu, passa da u visu di un pueta a l’ascoltu à quellu di due donne chi scacaneghjanu o à una manu chi piglia un bicchiere. U filmatu hè un unicu « plan-séquence » e un ha fattu l’ugettu d’alcun muntame. A luce e quella di a salla.